2009年6月8日 星期一

窮青年步父後塵自殺 供養母親弟妹 近期失業被追學貸減綜援

(明報)2009年6月8日 星期一 05:05

【明報專訊】一名22歲孝順青年,其父8年前因失業貧困吊頸自盡,剩下妻兒四口。青年自此身兼父職掙錢養家,近日陷入失業、遭扣減綜援 及被追還學費貸款等多重困境,昨日在藍田平田邨寓所留下10多封遺書燒炭身亡。父子相隔8年走上絕路,家人悲慟之餘,還要為殮葬事宜憂慮。

社署 發言人表示,已派員接觸死者家屬提供協助,並可安排發放殮葬津貼。

燒炭身亡青年賴獵羽(22歲),英文名Yama,家人指賴自小患哮喘 病,本與父母及弟妹居於慈雲山,其父任職廚工多年,及後因失業經濟拮据,恐無能力照顧家庭,於01年9月11日在家中自縊。家人為免觸景傷情,獲准調遷至藍田平田邨平信樓現址,賴與母親、14歲胞妹及19歲胞弟居住至今,並申領綜援。

曾在英皇娛樂工作

賴自小醉心娛樂事業,04年在香港專業教育學院 修讀酒店、服務及旅遊學系的娛樂事業營運學高級文憑,為期3年,但入讀兩年便輟學。賴於06年曾接受雜誌訪問,報道指他在旺角 開設「格仔舖」,但家屬澄清賴僅協助朋友宣傳,該舖並非其擁有。

家屬透露,賴07年獲英皇娛樂集團聘用,負責歌迷會聯絡工作。據悉,其偶像為歌手容祖兒 ,與歌手鄭希怡 較熟稔,有傳他正暗戀一名女子,但家人指他未有拍拖,亦未談及感情事。賴入職後曾表示工作不太理想,面對很多閒言,去年抵不住壓力辭職,自此失業逾年。

賴母深知兒子獨力養家辛苦,故領取綜援期間曾暗中兼職收銀員及在馬會兼職幫補家計,但其後遭社署揭發,加上賴已成年及有工作能力,遂扣減其綜援金。賴的胞弟正自修重讀中七,社署職員今日將與其弟見面,以核實資料,及調查是否需進一步扣減綜援金。

家人指近日屢被追還款

家人表示,賴在學期間向政府借貸約6萬元學費及約5萬元生活費,連利息欠下10多萬元,近日屢遭催促還款,賴因無收入多時,遂已申請延期還款。但據悉回覆是生活費欠款,必須率先償還,引致做擔保人的七旬外公飽受困擾,生活雪上加霜,賴疑不堪重重壓力下燒炭。

家屬驚聞噩耗後,哭訴政府不近人情,又指賴不煙不酒,勤力上進,孝順顧家,賴母念及愛兒更痛哭斷腸。賴留下10多封遺書,內容逐一向家屬道別,並對無法履行的承諾頻說「唔好意思」。容祖兒及鄭希怡聞訊後亦大表惋惜,希望家屬不要太傷心,並呼籲年輕人珍惜生命。

事發於昨午12時許,賴的胞弟欲如廁時,發現廁門反鎖,拍門良久無回應,其後在門隙間赫見一隻手,心感不妙下撞門而入,驚見哥哥昏迷,身旁有一炭爐,大驚報案。救護員到場將他送院搶救,延至12時30分不治,警方調查後相信案件無可疑。

真系估唔到, 无钱读书问政府借, 最后会被政府逼死! 点解呢D 事会系香港呢D 相对富裕既社会发生?

38 則留言:

黑人 提到...

邊個話香港地肯努力就餓唔死?

呼籲年輕人珍惜生命都多餘,香港地無錢就無權生存,可惜死都唔平

** 飛雪素素 ** 提到...

殺人放火金腰帶,修橋補路無屍骸。

bittermelon 提到...

香港就係一個咁樣的地方, 有錢才有得生存.哎...

陳大文部落 提到...

香港社會確是存在很多問題,但有時候,有啲人做事也很值得商榷。

自殺果個人,從報導看來(真係根據報導㗎下..),曾在教育學院讀酒店課程,咁你讀讀下又唔讀,走去開市場觸角要極敏銳的「格仔舖」,仲要又咁係你自己開,又去英皇做歌迷會聯絡工作,同阿邊個邊個歌星「好熟」咁又點???


歌迷會呢啲咁嘅工作,無乜人工,只係見下明星,唔可以當真正職業。


又「醉心娛樂事業」,衰啲講句,佢知唔知咩係娛樂事業?你估話做娛樂就得咩。


社會係有好多問題,但亦有不少人得到幫助,自殺果個人,老實講,佢自己都唔識為下自己打算,典型明星夢、追隨明星 ( 把咩~~)、話面對好多「閒言閒語」,我覺得佢太幻想自己係名人。


我唔覺得佢有幾努力,佢只係去追隨一啲唔適合佢嘅嘢,同埋好多明星夢想,零零散散無清晰目標。


講完。

陳大文部落 提到...

政府無迫死佢,佢要錢,政府都已經俾左綜援啦,仲有學費貸款,但學費貸款事實上係要還的,如果真係特別情況,佢可以申請學費津貼,這是另一問題。


錢,係無人嫌多嘅,咁佢要錢政府亦唔係話無得俾佢。

唔好以為「同阿乜乜明星好熟」、「曾有雜誌訪問過囉」就真係以為自己係明星啦。

如果真係同阿邊個明星講到咁熟,不如叫娛圈人士幫下手帶你入行啦,玩歌迷會有【】用咩。


唔見得佢幾時有「努力養家」喎。

我個人認為,有些人生活雜亂無章,唔學習為下自己打算,唔好下下同「政府迫死我呀」扯埋一起。

人地點迫死你呢又? 個個月有 $$$ 入戶口迫死你?

去啦去啦,歌迷會啦,同明星做 friend啦,好威呀好型呀,有雜誌同我傾過幾句好開心呵,好叻呵 ~~~~

Plastic G 提到...

extract from 蘋果日報:-

1) "家境清貧要領綜援"
<-IVE 喎, 唔係d 自負盈虧副學士喎, 窮學生讀書唔係有 full grant 架咩?!
如果係生活費既 "loan", 先洗未來錢, 要還好應該丫. 一個學生其實靠幾份補習已經可以夠平時生活洗費, 借得呢畢錢, 就知要還啦.

2)"其間更與友人合資在旺角一家商場經營小生意", "06年 6月,阿羽用盡自己積蓄 10萬元與好友投資日本時興的「格仔舖」..",
"05年去日本秋葉原旅行時,發現格仔舖在日本很普遍.."
<--有錢做咁多野, 冇錢還 loan 要搞到自殺, 乜原來係香港既物質生活迫佢走上絕路? 咁樣又入政府數? 做香港納稅人真係橙, 可唔可以民主d 投票擇選d 真正有需要既受助人去幫?

記唔記得以前有單新聞講一個男仔買名牌洗哂份糧得返幾蚊肚餓報警求助?

香港既青年唔食飯打機打足48 小時都未死得, 但冇名牌冇得去日本shopping 就會死架.. 香港好恐怖, 佢地快d 返火星啦!!

匿名 提到...

不見可欲, 其心不動. 這位大好青年看過偶像們紙醉金迷的奢華淫亂生活, 與自己的一塌糊塗的貧寒生活一比, 心理陷於不平衡狀態, 加上失業的打擊, 經濟的拮据, 精神出現嚴重問題, 在身邊無人慰解的情況下, 絕望地走上黃泉路. 這是一宗不幸的事件, 主要是社會的錯.

bittermelon 提到...

樓上匿名話係社會的錯,敢問社會點錯? 與其說是社會的錯,不如說是家庭的問題吧?

匿名 提到...

自殺係未會傳染架?呀爸又係自殺喎!
不過個男仔眼大大經新潮咁,可能真係發明星夢都吾奇!
D明星最鐘意利用這種思想簡單的人.
至於那些格仔鋪真係咁簡單咩!呢處又吾係日本有時日本work吾代表香港掂.我諗位位哥哥都係太幼稚,咁年青自殺可惜!


桃子

L L 提到...

這一代年青人的抗逆能力普遍很低。

令人唏噓!

Plastic G 提到...

家庭問題? 因為太窮?? 咁香港人唔好生仔喇, 費事d 仔女大個怨點解你唔係李超人 or 小甜甜, 又或者怨點解自己唔係小小超點解冇得食伊沙貝拉.

李嘉誠份人係點唔講, 但佢發奮上進既事係值得宣揚, 等而家呢一代年青人知道, 冇野係由天跌落黎, 樣樣野都要靠自己一手一腳去拚搏捱苦先有. 慣左手勢開口問就乜都有, 冇女又要死, 冇錢又要死, 俾老師老闆鬧又要死, 佢今日死唔去, 救得佢幾多次?

d 年青人明知自己書又讀唔成, 仲借政府生活費去揮霍, 玩完冇錢還, 政府淋佢紅油咩? 已經唔係借大耳 O 喎, 被迫裸跑既都未去死, 蘋果日報最叻煽情啦.

Betty 提到...

Um... 唔系话格仔舖其实唔系佢既, 系朋友既吗?

其实佢以前几有钱, 可以开铺头做小生意都好啦, 现在失业已经一贫如洗, 甘我觉得就无谓逼佢还钱咯. 就好似一D富豪可以风光过, 但一个海啸一样可以乜都无晒. 政府同大耳隆唔同架嘛, 唔系下下净系睇deadline. 等佢搵到野做, 先叫佢还钱都得呱.

Betty 提到...

Plastic G:

E? 我POST呢份系明报哦!

bittermelon 提到...

Re:Plastic G
又唔係社會既錯,又唔係家庭既錯,咁你言下之意即係佢自己既錯啦,你係咪想話佢抵死? Oh,明白哂.

Plastic G 提到...

To: 小瓶子~~

蘋果特別多呢類新聞丫麻.(其實係我習慣睇蘋果 =p)

其實有咩可以證明到佢"真係"因為政府追還貸款而尋死?

係人都知借錢最好問政府借架啦. 居然有人會擔心俾政府追數? 太天真太傻太令人難以置信.

收埋幾十萬唔肯還o個d 先驚政府查佢者.

Plastic G 提到...

我冇話佢抵死.我係想講,佢適應唔到呢個社會,係佢個人問題.d 植物適應唔到d 環境一樣會枯死. 

問題係,佢心靈殘障,可以點幫佢? 幫佢還loan? 佢既困局乜係政府做成?! 俾你放寬10 年唔洗佢還錢,佢既性格你慌佢有能力還到? 你只係保證到佢呢10年唔會尋死者. 到佢一日又覺得自己山窮水盡冇希望自卑作祟,結果咪一樣.

呢個 case 應該調轉寫,教識班細路,出得黎行預左要還,借人錢係要還架.唔想有今日,冇咩事就唔好先洗未來錢喇.

咁樣額外照顧呢d 人,對o個d 生活自制又生性既小朋友又有幾公平?! 咁樣又間接灌輸左咩訊息俾d 小朋友?

匿名 提到...

唔宗自殺主要係社會嘅間題, 佢個人嘅問題只係次要; 如果環境惡劣, 冇水有陽光, 仙人掌呢種咁粗生嘅植物, 一樣會枯死. 

呢個社會風氣敗壞, 個個見錢開眼, 窮人飽受歧視, 近期經濟大環境又好惡劣, 令佢加入失業大軍, 加上政府債務嘅壓迫, 佢嘅心靈變得好脆弱, 身邊又冇社工或者其他志願團體伸出援手, 佢六神無主, 精神失控, 結果....

Betty 提到...

穷人读书都要比甘多钱, 又几惨既....

当年我读三年大学 full grant full loan, 毕业要还十万.

好在当时有奖学金+埋parttime & summer job, cover 到, 而且未毕业已经有offer, 所以唔觉得辛苦.

当时胆粗粗一毕业就买层楼, 架下想起都一额汗!

你睇下依家甘既社会环境, 政府提出大学毕业生拿四千蚊人工, 返大陆做野三千, 叫人当拿嗰 training. 甘点够生活吖? 点还钱吖?

我觉得现在大学毕业生要行既路, 比起我十年前辛苦好多咯. 遇到甘既情况, 迷失左都好正常姐...

Plastic G 提到...

To: 匿名 (2009年6月8日 下午 4:36)

窮人飽受歧視<--我左邊個同事拎住個二萬幾既 channel 腳踏飛甩雞毛既鞋, 我右邊既同事拎住個萬幾兩萬既 prada, 腳踏連卡佛正價3.xk 既高跟鞋, 我既裝扮cheap 過一個大學生身上既名牌, 加上樣又平庸既我都覺行出街飽受歧視, 今晚睇怕都要買包炭返屋企思考下自己生存既意義.

我o係高位做左蟹民仲有排未見家鄉鮮都唔鮮下, 又冇其他人會伸出援手, 所以今日我都有少少精神失控, 請大家唔好見怪. xdd

Plastic G 提到...

当年我读三年大学 full grant full loan, 毕业要还十万.
<--其實小瓶子你應該知, full grant 係交學費, 斗零都唔洗還架喎. 呢個case 係生活費, 拎得綜援即係full loan. Full loan 成十幾萬, 三年大學生活洗哂去邊? 人人幫人補習做part time 賺生活費時, 呢d 人就拎住十幾萬慢慢嘆??

我朋友細妹中七畢業o係名店做 sales, 都有成兩皮野一個月, commission 多時仲去到三皮. 乜大學生連 sales 都唔合資格做咁慘咩?

麥當當經理都有一皮卦.

而家d 細路好多個心剩係諗住一畢業等人用幾皮野請佢返去發夢, 而唔問下自己憑乜人地要俾呢個人工你.

Betty 提到...

聶秀康:

依? 乜你就系桃子?

聶秀康 提到...

no la......攪錯!手多!

Betty 提到...

其实话晒毕业已经系十年前既野...D数系点我都唔系话好记得, 有一D要还, 一D唔驶还, 总之D grant loan 我系应该无驶晒既.

嗰时响学校住, 食野都几平, 十蚊车仔面已经可以好饱. 日常最大支出都应该系买书. 嗰时候嗰EX读书好颠, 放紧暑假会提前买书温习, 所以我又颠埋一份. 就系因为甘, 所以无乜买旧书.

讲下讲下, 都好怀念以前既学校生活, 乜都唔驶想, 读书考试拍拖, 就系甘简单.

匿名 提到...

是報紙說政府逼死他的。

他幾個月未還錢,政府有機制發信給貸款的擔保人,只是循例而已。在香港借錢借政府的是最安全的,不會有滋撓電話不會上門淋紅油,很多人畢業十幾年了也未還錢,最多給政府申請破產。

04年借錢讀書05年去日本旅行,日本是東南亞地區旅費最貴的地方,未學會走就要飛并不是一件合理的事。問問身邊的朋友有幾個在學期間就去日本旅行的?而且還是借了錢讀書的,但書并未讀成?

中五畢業要找一份6500月薪的全職工作并不太難,連鎖式集團一直在請人月薪介乎6000~7000,即使在金融海嘯下街市的魚檔、肉檔、菜檔,魚排也一直有請人難的問題。有人冇工做有工冇人做,就看個人了。

...

報紙頭條竟然不用"美籍記者凌志美與李雲娜 遭北韓判處12年勞改 ",香港的傳媒公信力何在?

嗚呼...

Betty 提到...

甘又系既...我都种未试过去日本旅行....哈哈哈....

但我已经去左Western Europe/Australia/Cambodia/Vietnam/Thailand/Singapore/ Malaysia/Shanghai/Beijing....

日本, 真系相对来讲无甘大兴趣, D野太贵啦.

我想去东欧/Egypt 行下.

陳大文部落 提到...

以我個人立場( 我個人認為嗟),無須要仁義道德高地咁去睇呢個自殺青年。

唔理佢 IVE 又好、副學士又好,乜學位都好,亦唔理佢 full loan / 半 loan / 山 loan 都好,香港地今時今日,你無錢,政府衰極都借錢俾你,好老實講,我不嬲都罵爆政府,但有啲嘢,政府確實係有做到,例如綜援、學費 loan ,點都唔會出現「窮家子弟無書讀去做乞兒」嘅。


咁借左錢俾你讀書,讀完 supose 你去搵嘢做,搵到工出糧,仲要係分期還款,都算係咁啦。( DLLM ~ 奉旨俾你㗎?)


一朝發達?明日之星?「我覺得我好型做明星」? CEO 中環高等華人? 無㗎呢樣嘢。腳踏實地啦..唔該多謝合作 ~


讀讀下又唔讀,學位唔去完成,學費( loan) 白白浪費,去乜乜「歌迷會工作」,朋友開格仔舖,又唔係你開,花費時間去搞呢樣果樣,但全部都無目標嘅。


啊,無錢喇,無嘢做喇,政府債要還喇,「與娛樂圈無緣」喇,好慘喇,自殺了事。


至於香港大專學費是否貴的問題,我認為可有商榷,我都同意,學費水平係有得討論和改善空間。


但搞清楚,一有不如意事就自殺,然後就全世界欠【】左你,大佬 Come on ~~

陳大文部落 提到...

甘又系既...我都种未试过去日本旅行....哈哈哈....


-- 用自由行方式遊日本,只需 似三仟蚊左右,好抵玩。

剛好相反,其實今天的日本,物價大部份都比香港平 ( 信我,無呃你,真人真事)。

反而香港本土物價係貴得不尋常嘅。

以旅行嚟講,日本係應該要去下嘅,唔好去遊客區,而係「自由行方式」,你會覺得好愉快。

我或者會抽時間整個朋友去日本自由行嘅網誌,介紹下。係玩得好過癮的。

bittermelon 提到...

其實現今的香港年青人越來越不像樣,反觀大陸年青人就越來越叻,再這樣下去他們根本無法與他人競爭了,我上個月寫咗一篇文,講出了些大陸年青人在香港競爭的實例,有興趣不妨到以下看看.

http://bittermelon2009.blogspot.com/2009/05/blog-post_29.html

Betty 提到...

三仟蚊左右???

哗, 真系要介绍下.

Unknown 提到...

咩叫做俾政府迫死?借錢俾佢讀,讀讀下唔讀都算啦,當初係佢問政府借錢,欠債還錢天公地道。

匿名 提到...

香港嘅青年人越嚟越兩極化, 好嘅很好, 衰嘅極衰, 但係, 呢個自殺嘅青年人絕對唔係衰嗰種, 佢做事算係幾有責任感, 佢做過嘢嗰間公司嘅偽人都讚佢吖, 佢遺書都寫咗十幾封, 將所有嘢交代咗至走. 一個大好青年受到失業同債務問題嘅雙重打擊, 精神失去常態, 不明不白咁就走咗, 真係好可惜! 希望啲人冷靜啲諗吓, 唔好亂咁指責佢, 失業唔係咁容易捱架? 欠債亦係好大嘅壓力, 兩樣加埋一齊, 真係好易癲架! 尤其是係一個廿零歲嘅人, 俾啲同理心好唔好?

Betty 提到...

我唔系话佢唔应该还钱, 我系觉得现在甘既环境, 佢又失业, 屋企D细佬妹种读紧书, 系米可以迟D先还呢?

尤其是政府叫D大学生拿四千蚊人工好啦, 甘食都未必够食,搭车都未必够既情况下, 系米可以宽容D处理呢?

Betty 提到...

以前我老豆嗰个年代, 九岁就自己一个飘洋过海读书, 屋企会接济下但主要系靠自己. 到我呢代, 已经好难可以甘啦. 对落下一嗰generation 0既人, 大家都唔会再有甘既 expectation 啦.

Plastic G 提到...

其實我地既討論都已經離開左主題, 主要講時下青少年既心態.

呢d expectation 應該咩年代都要有. 好似獅子媽媽教識獅子BB 覓食技巧咁.

記得有次搭地鐵, 有個小朋友一見有位就爭坐. 佢阿媽就教佢要讓人. 點知佢阿媽個朋友就話: 由佢啦, 任性都係一種福氣黎.

又岩喎, d 小朋友真係夠幸福先可以"任性"得起. 如果呢位母親, 一生一世都照顧到呢個小朋友既需要, 無時無刻都保護佢既話, 就梗係幸福啦. 但係個小朋友終有一日會大, 離開母蔭出去闖, 如果唔教識佢面對社會, 遇到困難唔識自己諗辦法解決, 佢呢一刻既幸福, 就只會係佢將來幸福既障礙.

陳大文部落 提到...

三仟零蚊係四天機票連旅店(日本嘅旅店已經相當唔錯,唔同大陸嘅「旅店」 )

呢個價錢當然唔計自己另外買嘢啦係咪。

陳大文部落 提到...

[ 記得有次搭地鐵, 有個小朋友一見有位就爭坐. 佢阿媽就教佢要讓人. 點知佢阿媽個朋友就話: 由佢啦, 任性都係一種福氣黎...]


-- 我真係聽見幾乎一模一樣嘅版本。

仲有聽過好普遍嘅有:「...由佢啦,細路仔嚟㗎嘛...」

或:「 Hey 呀,細路仔梗係要就佢㗎啦 ~~~」

Betty 提到...

无问题吖. 我去旅行唔多shopping 既. 要shop 香港乜都有啦.

同埋介绍D 平既野食唔该, 但要干净新鲜好味. 我唔食得寿司, 甘你介绍饭团同拉面得啦. Thanks.

Betty 提到...

好奇怪, 细个时父亲的教育系一入地铁就冲入去霸位, 而且如果我霸唔到, 会觉得我反应迟钝.

但大大下, 到左初中, 我开始反叛, 大人讲东我偏向西行. 老豆抢到嗰位我都嫌肉酸唔肯坐, 反而掉反转头, 改变左老豆呢个坏习惯. 现在大家都规规矩矩入地铁.