2010年3月1日 星期一

礼金

转贴: 第四十七回:子曰, 反抗不了,就學會享受

前言:
总括来讲, 我系支持阿甲的观点, 男方给礼金女方是不合时宜, 不应该当作应份去给去收. 不过, 与他在细节中却争持不下. 可见得一男一女就算价值观相近都可以吆餐死, 如果价值观南辕北辙, 就更难磨合了.


突然想起某电影情节:



虽然 Mr. Darcy 讲的说话句句真心, 而且也确实是真相, 但这种对话不但没有说服效果, 更令 the marriage proposal 告吹.

故事:
小小琪:唔係賣女!

乙:咩野唔係賣女?

小:畀禮金唔係賣女囉,心意黎架嘛!

乙:咁又係,所以你打算畀幾 多禮金我老豆?

小:咩野畀幾多禮金你老豆呀,禮金係你畀我老豆架嘛。

乙:所以你冇心意?

小:咩呀,禮金 係男家畀架嘛。

乙:點解呀?

小:心意囉。

乙:咁你打算畀幾多禮金我老豆?

小:咩呀,都 話係你畀,唔係我畀架咯。

乙:所以你冇心意?

小:乜你講極都唔明架唶,傳統上禮金係男家畀女家架嘛。

乙: 以前男家娶新抱要畀錢女家,係因為個女養到咁大送左畀人,攞返少少補償都尚算合理。但今時今日女仔已經有能力賺錢回饋屋企人,亦即呢個習俗已經失去左存在 意義,咁重有乜理由要死守落去呢?

小:乜你乜都講錢架,呢個根本就唔係錢問題。

乙:咁我畀一蚊得唔得?

小: 咁又少得滯。

乙:咁咪即係錢問題囉。

小:咁你攞左人個女,係咪應該報答返人地呢?

乙:我幾時有攞左人個 女唶,我同你結婚之後你又唔會同佢地脫離父女關係既。

小:咁我入左你門,成為左你家既人丫嘛。

乙:咁我都入左你門,成為 左你家既半邊仔格,你又唔畀禮金?

小:點同唶?第日個仔跟邊個姓丫?咪又跟你姓!

乙:咁不如第日個仔跟你姓,然後你畀禮 金我唔畀丫。

小:嘩你咁唔要面都有既,唔洗個仔跟你姓?

乙:嘩你咁唔要面都有既,唔洗個仔跟你姓?

小: 我話緊你呀!

乙:所以女仔咁做就合情合理,男仔咁做就係唔要面?

小:咁男仔著裙都醜啦,因為個社會覺得男仔著裙醜丫嘛! 但男仔著裙本身都冇問題格。

乙:係冇問題格,點解我要覺得醜呢?

小:因為美醜係社會共同釐定架囉!大多數人覺得醜,就係 醜。

乙:咁我覺得唔醜都唔係錯格,你可以同我審美觀有出入,但唔可能話我審美觀錯誤格。

小:咁你著裙囉,等人人都笑甩個 嘴囉。

乙:我都唔介意人地笑甩個嘴。人地唔尊重我既審美觀,係佢地既錯,我何必在意?

小:咁你要標奇立異,係要承擔俾人 睇唔起既後果架啦。

乙:都話我唔介意咯。人地點睇我我控制唔到格,咁我何必將我既快樂建基響我控制唔到既野身上?

小:咁 我老豆點睇你你介意哪掛?

乙:我點解要介意呢?

小:因為佢係我老豆囉!你而家係咪唔尊重我老豆丫?我好錫我爸爸架。

乙: 所以畀禮金等如尊重你老豆?

小:梗係啦。

乙:所以你唔畀禮金等如唔尊重我老豆?

小:咁就梗係唔係啦,你 都打橫黎講既!男家畀禮金等如尊重女家,係因為傳統上男家畀禮金係等如尊重女家丫嘛,但你有冇聽過有女家畀禮金男家既傳統丫?冇丫嘛!

乙: 有喎,韓國人結婚係女家畀禮金男家架喎,重下下三、四十萬添,因為韓國女人結左婚之後好多都會留響屋企唔做野,要老公養佢一世,所以呢個傳統仍然有存在意 義。但香港人結婚之後女人多數都會繼續做野既,咁做乜重要男家畀禮金呢?

小:又講錢,都話唔係錢問題咯!響中國人社會,男家畀禮金女家係 傳統習俗,代表男家尊重女家,呢個代表性就係佢既存在價值。

乙:咁我畀一蚊得唔得?

小:咁又少得滯。

乙: 咁咪即係錢問題囉。

小:我個個姊妹結婚呀佢地老公都會畀禮金架啦!你唔畀禮金,我點同我D親戚朋友交待呀?你愛我就應該顧及我面子!

乙: 咁你幫我含撚丫。

小:下?都話我唔做呢D野架咯!

乙:我個個兄弟扑野呀佢地條女都會含撚架啦!你唔肯含撚,我點同我D豬 朋狗友交待呀?你愛我就應該顧及我面子。

小:你都打橫黎講既!咁我唔鍾意用口丫嘛,你知格!

乙:咁我唔鍾意畀禮金丫嘛, 你知格。

小:你都唔錫我既!

乙:你都唔錫我既。

小:喂,拍拖梗係男仔錫女仔,男仔氹女仔,男仔就晒女仔 架啦!你有冇紳士風度架你呀?

乙:英國人娶新抱畀禮金,未聞有也。所以所有英國人都冇紳士風度?

小:點同唶,人地都冇畀 禮金既傳統!

乙:所以講黎講去要畀禮金都係因為傳統係咁,而唔關有冇風度事?

小:咁響香港男人響經濟上照顧女人等如有風 度丫嘛。

乙:所以你冇風度?

小:女人講乜野風度唶,女人講淑女氣質架嘛。

乙:所以你冇風度?

小: 女人都冇所謂有冇風度!

乙:咁傳統中國女人知道男人去叫雞都應該啞忍,所以我去叫雞你會啞忍?

小:點同唶,你去出面搞三 搞四即係唔愛我,但我要你畀禮金都唔係唔愛你,而係想成件事好好睇睇。你禮金畀得少呀,你自己都冇面啦。

乙:都話我唔在乎面子咯。

小: 即係你唔要面啦?

乙:如果「唔在乎面子」等如「唔要面」,咁我唔要面囉,但有乜問題唶?

小:咁中國人係要講面子架嘛,而 家唔止係你既面子呀,重有我同我老豆老母既面子呀!點解你咁自私淨係顧自己架唶?

乙:你無啦啦要我畀一大舊錢你,反而係我自私?

小: 咁你點解死都唔肯畀丫?你又唔係畀唔起,你有乜野損失唶?

乙:我損失左我尊嚴同原則。

小:即係你原則比我既快樂更緊要 啦?

乙:唔係,你既快樂比任何野都緊要。但你唔快樂係你自己攞黎既,你唔快樂係因為你貪慕虛榮、愛面子,而唔係我導致既。事實上,快唔快 樂永遠都係自負盈虧,與人無尤,你懂得豁達地笑看世間事的話,天跌落黎你一樣可以好快樂。

小:你站響你角度你覺得唔畀禮金合理,但你又有 冇諗過站響我角度我會覺得畀禮金先至合理呢?點解你唔可以設身處地站響我立場睇成件事?

乙:你覺得畀禮金合理,我覺得唔合理,點解你又唔 可以設身處地站響我立場睇成件事?講到尾你就係覺得我要就晒你,你就唔洗就我。

小:咁女仔係要就架啦!

乙:點解男人唔洗 就呀?

小:因為男人應該大方D囉!

乙:所以你承認自己小家?

小:我係小家喔,你可以唔娶我格!

乙: 你承認係你唔著,重要聲大夾惡?

小:你識我果陣已經係咁架啦!

乙:我唔介意原諒你,但你唔可以將唔合理既野講成合理,更 加冇理由要我認同歪理。

小:而家係你覺得唔合理咋喎,唔係我喎,我覺得好合理架喎!點解你係都要逼人認同你果套價值觀架唶?

乙: 而家唔係我逼你,而係你逼我,係你以強迫性口吻暗示「如果你唔畀禮金我就唔嫁」,所以響呢件事上,我先係被動者,你唔好調轉黎講。

小:但 如果你始終唔畀禮金,咪等如逼我地接受左你既條件。

乙:我冇開到任何條件,你唔好屈我。而家係你開出一個條件,但我唔接受,我唔接受你既 條件又點會等如我逼你接受我既條件?除非我都要求你畀禮金,否則唔係你就唔可以話我有開出任何條件。

小:但你而家明明係如果要畀禮金就唔 娶我丫嘛!

乙:你又調轉左黎講--而家係我肯無條件娶你,但你就要我畀禮金先肯嫁我,所以係你單方面開出左一個唔公平既條件,係你要我無 端端畀一舊錢你屋企人,所持既理據講黎講去就係「傳統如此」,但我已經講過只要某傳統過時而且不合理,我地就冇必要繼續遵守。

小:都話而 家係你覺得呢個傳統唔合理咋嘛。

乙:合唔合理唔係「覺得」既,而係客觀事實。一件事唔合理就係唔合理,正如被強姦者要被處死係唔合理就係 唔合理,唔會因為去到伊斯蘭國家就變得合理。

小:其實我都明你講咩,但我爸爸都一把年紀咯,老人家係咁架啦,係比較重視傳統架啦,佢真係 唔係為錢架。你咪當為佢面子著想又好,為左令佢開心D都好,妥協下囉。

乙:所以你同意你老豆呢個價值觀有問題?

小:又唔 係有問題……唉,我都唔知點講呀,但你都知我好錫我爸爸,你咪當就下佢囉。

乙:咁如果你老豆好爛賭,係要我地不停畀錢佢去賭佢先覺得開 心,先覺得有面子,我地又應該不停畀佢?

小:咁又冇理由要你畀既,但講真我可能會畀架。

乙:咁你畀錢佢去賭果陣,會唔會 好似男人畀禮金咁畀得一臉心甘情願,一臉多謝都黎唔切咁丫?

小:咁又唔會,可能都會試下勸下佢既,不過會畀囉。

乙:咁你 唔勸下佢唔好收禮金?

小:咁我唔覺得收禮金有錯丫嘛。

乙:咁都有人唔覺得爛賭有錯格,有賭未為輸丫嘛,你又勸?

小: 大家已經公認左爛賭係有問題丫嘛!

乙:大家都公認冇問題既野唔代表冇問題架喎,沙地阿拉伯都有好多條村覺得處死被強姦者冇問題格,咁係咪 等如冇問題丫?

小:都唔同!咁不如你講下收禮金有乜問題勒。

乙:強迫一個人無端端送錢畀另一個人,咁都冇問題?

小: 你成日話「無端端」,都唔係無端端!你而家係娶左人個女丫嘛,點會係無端端唶!

乙:何謂娶左人個女丫?

小:即係同人地個 女結婚囉。

乙:咁你都同人地個仔結婚啦,你唔畀禮金?

小:都話傳統係男家畀禮金架咯!

乙:所以你講黎講 去既唯一理據咪「因為係傳統,所以無論如何都要遵守」囉。

小:咁遵守傳統有乜唔啱先,係咪要廢除晒所有傳統先至啱丫?

乙: 咁傳統女人都係要紮腳架啦,你唔紮?

小:咁果個傳統有問題丫嘛!

乙:所以我而家咪正正係話畀禮金呢個傳統有問題囉!

小: 紮腳呢D係大是大非,點同畀禮金唶?

乙:所以你認同左假如個傳統有問題,就應該被摒棄?

小:係丫,但我已經講過唔覺得畀 禮金有問題丫嘛。

乙:你不停響度重複回避問題,呢D野根本頭先講過晒架勒。我話畀禮金既問題在於冇理由要我無端端畀錢你老豆,你就話有理 由,因為呢個係傳統。然後我話有問題既傳統應該被摒棄,你就返番轉頭話呢個傳統冇問題。你唔記得左你之所以要訴諸傳統,正正係因為默認左呢樣野有問題,而 個問題正正係冇理由要強迫一個人無端端畀錢另一個人。

小:都話唔係無端端咯!其實而家好多時候擺酒,女家都會負責出一份架啦,你畀D禮金 都未必夠cover條數呀。

乙:假設擺酒係一人出一半,我果半係我出,你果半係用我畀你D禮金畀,即係又係我出,咁都算公道?

小: 咁我嫁入你家我阿媽重會畀好多嫁妝我帶過去架嘛,果度都分分鐘有幾萬蚊啦!

乙:D嫁妝係畀你既,亦即係畀返女家自己既,而唔係畀我阿媽 既。否則的話,我阿媽可唔可以攞左你D金器去溶然後袋左D錢丫?

小:咁你畀禮金我老豆會開心D丫嘛,你係咪想搞到佢睇唔起你丫?

乙: 如果佢會因為我唔肯送錢畀佢洗而睇唔起我,咁係佢價值觀有問題,你應該鬧佢而唔係鬧我。再者,假如你肯撇除傳統不論,咁無論係令你老豆開心也好,證明我愛 你都好,都無法解釋點解女家就唔洗畀禮金男家。難道你就唔想令我開心,唔愛我?

小:我唔愛你點會同你結婚唶!

乙:咁我唔 愛你點會娶你唶?

小:但你唔畀禮金的話我老豆會唔開心丫嘛,我老豆唔開心即係我唔開心。點解你係要咁自私,係要覺得原則比我既快樂更重 要?換轉係我,只要係可以令你開心既野,我都會做。

乙:講大話!而家你明知我就係唔畀禮金先開心,又唔見你做?可見你根本只係想你自己開 心,乜野可以令我開心既野你都會做,講就好聽,但其實不過係空口講白話,到左真係要取捨果陣你根本就會以自己為先。咁到底係邊個自私?

小: 我……我估唔到你咁睇我!

乙:唔係我咁睇你,而係事實。你話可以令我開心既野都會做丫嘛,咁你又要我畀禮金?

小:……

乙: 點呀,重有乜野歪理添丫?

小:好,如果你唔畀禮金真係會開心D的話,我唔洗你畀。我老豆果度你唔洗擔心,我會同佢講。

乙:……

小: 滿意啦?

乙:滿意,但唔開心。

小:你又煩乜唶?

乙:你都唔開心,我點開心?

小:咁你係 要搞到我唔開心丫嘛,你想我點開心畀你睇唶?

乙:唔係我搞到你唔開心,而係你自己諗唔通,所以唔開心。其實你洗乜理人地點睇你唶?你錫你 老豆,唔代表佢諗乜都係啱格,更加唔代表你要聽晒佢講。你應該睇邊個有道理D,而唔係邊個輩份高D。「天下無不是之父母」、「祖宗家法不可廢」呢類歪理, 已經為禍左中國二千幾年,蠶食左我地既心智二千幾年,點解重要死守落去?快唔快樂係在乎看唔看得開,我地冇辦法令到所有人都認同我地,但就有辦法唔介意人 地認唔認同我地,係咪?

小:但孔子都話啦,改變不了世界,就要改變自己。你唔畀禮金有乜用唶?個傳統都唔會因此而改變格!你地夠成日話要 平反六四爭取普選啦,有用咩?都冇用!

乙:所以有人強姦你果陣,你反抗唔到,就真係會嘗試享受?呢個說法響現今中國社會竟然被視為不可多 得既道理,其實係相當恐怖。中共重新推銷孔子學說,正正係因為孔子話一句野啱唔啱唔係睇佢合唔合理,而係睇講果句野既人既身份地位。如果果句野係你老豆講 既,係「國家」講既,咁就連歪理都變成真理。受到壓迫咩?千祈唔好反抗,因為反抗都冇用,所以你要學會享受,享受俾不公義既制度強姦。但呢個說法既荒謬之 處在於,點先算係「反抗不了」?到左乜野地步先可以確定自己絕對「反抗不了」?我地人人都放棄反抗的話,又點知道最終會反抗不了?中共就係唔想你地反抗!

小: 又關共產黨乜野事唶。

乙:個道理一樣咋嘛,而家你講到尾就係要就晒你老豆丫嘛!如果唔係佢會好冇面子丫嘛!所以你就唔理件事本身合唔合理 丫嘛!老豆幾咁唔啱我地都唔應該指出佢錯處丫嘛!

小:你咪咁勞氣住啦。

乙:……

小:我明你講乜呀,所以 咪話唔洗你畀禮金囉。

乙:嗯。

小:其實阿乙呀,就算畀禮金幾唔合理都好,點解你唔可以豁達D畀左佢就算唶?又唔係六四 呀、普選果D,其實好小事咋嘛,你又唔係畀唔起……我始終諗唔通, 你死都唔畀禮金到底有乜好處?你畀的話,大家都會開開心心,你咪當呃個細路仔有聖誕老人囉。你死都唔肯畀,一陣搞到同我屋企人關係冇咁好,有乜謂唶?原則 真係咁緊要咩?

乙:……

小:嗯?

乙:如果我畀左你真係會開心D,咁我畀啦。

小:下?

乙: 我話我肯畀禮金。你老豆想要幾多,就畀幾多佢啦。

小:下?但係……你都畀得唔開心既。

乙:我畀得好開心。

小: 咁你又話--

乙:我肯畀,唔係因為我愛你,唔係因為我尊重你老豆,而係因為我軟弱,我冇勇氣,我冇勇氣同不合理既傳統對抗,冇勇氣同儒家 既陳腐思想對抗。你講得好啱,畀禮金,其實我冇乜損失,反而係唔畀禮金的話我會俾你老豆睇唔起,會承受好多壓力,甚至會娶唔到你,失去你。所以你要搞清 楚,唔畀禮金一D都唔自私,反而係一種犧牲,為不盲目向傳統屈服而犧牲。我畀禮金,係因為我冇勇氣犧牲,係因為我唔想承受壓力,所以我屈服。

乙: 你應該敬重果D能夠不怕艱辛,能夠勇於打破不公義制度既果種人。但你而家反而用一堆歪理屈佢地自私,屈佢地唔顧女朋友感受,你知唔知有幾無恥?有幾唔公 道?你地D女人今日之所以可以投票、可以讀書識字、可以做醫生律師議員、可以唔洗紮腳,正正係因為有果種肯自我犧牲既人拼命為你地打破以前公認係正確既傳 統,佢地面對既往往唔止係社會壓力,而甚至係死亡。我自己就做唔到,但假如真係有堅決唔肯屈服畀禮金既男人,我希望你明白佢其實唔係自私,而係無私至真。 佢就正正係將其他男人應有既權利睇得比自己既幸福更重要,所以先要堅持,就算係受千夫所指都在所不惜--我自問就冇呢種高尚既情操同風骨。肯抗爭既人係無 私既,佢地唔介意犧牲,為成個社會犧牲。就算你唔認同,都至少請你諒解,唔好再誣蔑佢地自私。

18 則留言:

Ebenezer 提到...

洋洋十萬字嘅blog,勁!

Betty 提到...

阿甲写野系有一手既...

爆炸頭 提到...

咁人地篇野長得黎句句有point

Betty 提到...

系有 point 既.

魔術師 提到...

我給阿甲的留言,合轉載:

因為現實就是有強權無公理,你同唔講道理的人講道理是無用的,如果唔講道理的人拳頭硬,一拳打死咗你,咁你幾有道理都無用。

成王敗寇,正義就是由活着的人所寫。要有自由,就先要有「本錢」。

只要阿乙有條件,佢大可以去找個比阿琪更好更值得愛價值觀亦相近的女子。

***

至於阿琪認為「即使傳統不合理亦要遵守」,和阿乙認為「對於不合理的傳統就要抗爭,就要打破」,其實並無相左,只是價值觀不同,沒有誰對誰錯之分。

在對話中,硬要分對錯,我認為並不恰當。成個case,我會話係雙方都對,只是個人選擇不同。

至於阿乙為什麼一定要愛阿琪?他有沒有自由去愛其他女子?他有沒有其他選擇?本章並無談及。

所以,人生中最可貴的,其實是埋藏在整件事的「設定」中,這就是「選擇」。

Betty 提到...

魔術師:

E? 你讲到嗰重点出来哦.

匿名 提到...

可否轉載此文章於 facebook?

魔術師 提到...

補充一下:

人是會犯錯的動物,理智的人,講道理的人,如果發現自己犯了錯,自然會改正。

但對於不理智,不講道理的人來說,佢地係會接受自己的錯。

作為旁觀者,你有自由指出他人的錯誤。如果那人是講道理的,自會更正。但如果那人是不講道理的,那麼他就不會接受你的指正,這是他的自由。

所以,「指出他人錯誤」是合理的,但「硬迫不願意更正的人去更正」就不合理。無論你係幾有道理都好。

咁,唔更正錯誤有乜問題?在學校,唔更正會被老師罰,響屋企會俾父母鬧,響社就「可能」會難搵食。所以,講來講去,懲罰唔去「更正錯誤」的,就只有「權力者」,或者係「市場」。

咁,如果唔肯更正錯誤的人操控了市場又如何?

無嘅,你初頭唔知,同佢講道理,佢唔聽,你發現佢係唔講道理嘅,而且佢又唔會被市場懲罰嘅,咁你仲要其接受你嘅道理,就係你錯,就係你蠢。

魔術師 提到...

補充2:

所以,如果上文的阿乙是有自由與其他女子發展感情,但他卻依然選擇留在阿琪身邊的話;咁成件事,就是他的「理性選擇」。佢放棄了原則,換來了阿琪,只是「等價交換」,唔應該講到「我畀禮金,係因為我冇勇氣犧牲,係因為我唔想承受壓力,所以我屈服。」咁委屈。

韻味熊貓 提到...

這是一篇謬論。傳統不可能一下子改變!

要我評它的辯理價值,是零分。

美國南北戰爭(1861-1865),死了七十萬人。結束後,黑人的社會地位和實質情況,無重大改變。

今天奧巴馬上台,他是「黑人白心」。黑人的社會地位根本無變過。

無人可以一下子改變傳統。誰人去做,就會帶來災難性的後果!

** 飛雪素素 ** 提到...

點解靚仔都總係鍾意見到靚女喊…

Betty 提到...

匿名

我都系转载阿甲的文章, 我估你写明系阿甲写的文章, link 晒, 应该无问题呱.

方潤 提到...

1. 多餘,印度嫁女畀禮金畀到破產添,唔見佢跟﹖

2. 愛情唔係去超級市場買野,人亦冇兩個一模一樣。所以冇辦法話「揀第二個丫笨」,因為你就係咁岩鍾意著佢。

3. 問題既核心係,究竟愛一個人應該犧牲多少原則﹖這個問題不單問甲,同樣要問乙。
(如果乙要甲為了愛她犧牲原則,其實乙愛的其實還是不是甲﹖放棄了原則的甲還是不是原來的那個甲﹖)

韻味熊貓 提到...

如果乙要甲為了愛她犧牲原則,其實乙愛的其實還是不是甲﹖放棄了原則的甲還是不是原來的那個甲﹖

兩個人一起,各持原則,激情過後,關係就玩完。一定要互相放棄一些原則去迎合對方,形成了新的共識,才可以繼續一起走。

此是心理學家Heider的Balance Theory.

魔術師 提到...

方潤:

「愛情唔係去超級市場買嘢...無辦法話揀過第二個...」

奇哉怪也,現在不是盲婚啞嫁的時代,自由戀愛的意思,就係「唔啱揀到啱」,現代人離離合合當食生菜,咩叫「無辦法話揀過第二個」?學你話齋真係鍾意呢個人,咁你就要包容佢,甚至放低一些原則,盡量妥協;咁如果到某一程度,你真係唔能夠再妥協,而對方又唔肯相讓的話,咁分手搵個第二個,又有乜野問題?

韻味熊貓 提到...

方潤:

我認識一對情侶,真是為了禮金和婚後財政分配的事鬧翻了。

結果男的在半年後跟另一女人結了婚;女的在一年多後嫁了人。

在兩性關係上,堅持原則?恕我直言,你的伴侶是一隻吹氣公仔,就絕對無問題!

方潤 提到...

1. 我說「冇辦法話「揀第二個丫笨」」不是說人沒有選擇的自由(如果有人要這樣理解是自己想得太遠),而是說人不同貨物。你愛的人是獨特的,並不是拿著一堆條件在很多個「女人」之中選一個。
不如我們購物時,見到其中一盒凹了就拿第二盒。因為貨物盒盒一樣,女人個個不同。

2. 我沒反對過妥協,所以說「究竟愛一個人應該犧牲多少原則﹖」才是問題所在。

兩人都要/會改變﹖是事實。但改變多少﹖改得太多會否變成另一個人﹖你是否真的想他改那麼多﹖這是每一個人自己要想清楚的。

3. 原來堅持原則就要當伴侶是吹氣公仔,這種邏輯恐怕連明光社也想不出來。

還是反過來,完全不顧原則只求一偶的人,才是當伴侶是吹氣公仔﹖

魔術師 提到...

方潤,

就係因為人人各自的attribute都不同, 所以先至「有得揀」。

例如你覺得A小姐樣樣都好,淨係衰在要你俾禮金,你唔想同佢有爭執的話,咁咪俾囉;但係如果你覺得呢個女仔其實都唔係咁好,唔值得為佢放棄原則的話,咪去找過第二個囉。第二個未必樣樣都好過原先的A小姐,只不過雙方接受到就可以。

如果你話阿A真係咁百年一遇,你又convince唔到佢去接受你果套的話,咁你就唯有讓步。

一個願打一個願捱,我唔覺呢D叫「逼」囉。